Act 18 | NdeIBE | STEP | Ngemuva kwalokho uPhawuli wasuka e-Athene waya eKhorinte.

Acts 18

EKhorinte

1 Ngemuva kwalokho uPhawuli wasuka e-Athene waya eKhorinte. 2 Khonapho wahlangana lomJuda owayethiwa ngu-Akhwila, owasePhontu ngomdabuko, owayesanda kufika lapho evele e-Ithali lomkakhe uPhrisila ngoba uKlawudiya wayekhuphe isinqumo sokuthi amaJuda wonke kawaphume eRoma. UPhawuli wahamba wayababona, 3 kwathi ngoba engumenzi wamathente njengabo wasehlala labo wasebenza labo. 4 NgamaSabatha wonke wayesiya esinagogeni ebonisana lamaJuda lamaGiriki ezama ukuwaphendula.

5 Kwathi oSila loThimothi sebefikile bevela eMakhedoniya uPhawuli wasenikela isikhathi sakhe sonke ekutshumayeleni kuphela efakaza kubaJuda ukuthi uJesu wayenguKhristu.

6 Kodwa kwathi lapho abaJuda bemphikisa njalo bemchothoza, wathintitha izambatho zakhe phambi kwabo wathi, “Igazi lenu kalibe phezu kwamakhanda enu! Mina sengiwenzile owami umlandu. Kusukela manje sengisiya kwabeZizwe.”

7 UPhawuli wasesuka esinagogeni waya endlini eyayiseceleni, ekaThithiyu Justu, umkhonzi kaNkulunkulu. 8 UKhrispu, umphathi wesinagogi, kanye lendlu yakhe yonke bakholwa eNkosini; kwathi labanengi bamaKhorinte abamuzwayo bakholwa babhaphathizwa.

9 Ngobunye ubusuku iNkosi yakhuluma kuPhawuli ngombono yathi: “Ungesabi; qhubeka utshumayela. ungathuli.

10 Phela mina ngilawe, kakho ozakuhlasela akulimaze, ngokuba ngilabantu abanengi kuleli idolobho.”

11 Yikho uPhawuli wahlala khona okomnyaka olengxenye, ebafundisa ilizwi likaNkulunkulu.

12 Kwathi uGaliyo engusibalukhulu wase-Akhaya, abaJuda bamanyana bamhlasela uPhawuli bamletha emthethwandaba

13 bammangalela bathi, “Indoda le idonsela abantu ekukhonzeni uNkulunkulu ngezindlela eziphambene lomthetho.”

14 Kwathi uPhawuli esathi uyakhuluma, uGaliyo wathi kubaJuda, “Uba lina baJuda belibika ngokona okuthile loba icala lokuganga okubi, bekufanele ukuthi ngililalele. 15 Kodwa njengoba lithezana ngezinto zamazwi lamabizo langomthetho wenu – kulungiseni lina. Mina kangiyikuba ngumahluleli wezinto ezinjalo.”

16 Wasesithi kabaxotshwe enkantolo. 17 Bonke base bephendukela uSosithene, umphathi wesinagogi, bamtshaya phambi kwenkantolo. Kodwa uGaliyo kazange athi thiki lakancane.

UPhrisila Lo-Akhwila Lo-Apholo

18 UPhawuli waphinda wahlala njalo okwesikhathi esithile eKhorinte. Muva wasetshiya abazalwane wawelela eSiriya, ephelekezelwa nguPhrisila lo-Akhwila. Engakaweli, wagela izinwele zakhe eKhenkreya ngenxa yesifungo ayesenzile. 19 Bafika e-Efesu lapho uPhawuli atshiya khona uPhrisila lo-Akhwila. Yena waya esinagogeni wayabonisana lamaJuda. 20 Bamcela ukuthi ahlale okwesikhathi eside, wala. 21 Kodwa wathi esesuka wathembisa wathi, “Ngizabuya, uma kuyintando kaNkulunkulu.” Wasewela esuka e-Efesu. 22 Wakhuphukela eKhesariya wahamba wayabingelela ibandla wasehamba esehlela e-Antiyokhi. 23 Eseke wahlala e-Antiyokhi uPhawuli wasuka lapho wabhoda indawo ngendawo kuwo wonke ummango waseGalathiya lowaseFrigiya eqinisa bonke abafundi.

24 Kusenjalo, umJuda owayethiwa ngu-Apholo, owe-Alekizandriya ngomdabuko, weza e-Efesu. Wayeyindoda efundileyo, ilolwazi olukhulu ngeMibhalo. 25 Yayifundisiwe ngendlela yeNkosi, ikhuluma ngomfutho njalo ifundisa okuqondileyo ngoJesu, isazi ngobhaphathizo lukaJohane kuphela.

26 Yakhuluma ngesibindi esinagogeni. Kwathi oPhrisila lo-Akhwila beyizwa bayinxusa emzini wabo bayichazela ngokugcweleyo indlela kaNkulunkulu.

27 U-Apholo wayefuna ukuya e-Akhaya, abazalwane base bemkhuthaza, babhalela abafundi khonale ukuthi bamamukele. Wathi efika khona waba luncedo olukhulu kulabo ababekholiwe beholwa ngumusa. 28 Ngoba watshukana labaJuda ebaphikisa enkundleni, ebonisa obala eMibhalweni ukuthi uJesu wayenguKhristu.